Во пожар што избувна рано утринава на товарниот брод „Fremantle Highway“ во близина на брегот на Холандија, едно лице го загуби животот, а неколкумина се повредени, соопшти крајбрежната стража. Евакуирани се 23 членови на екипажот.
Бродот што превезувал возила пловел од германското пристаниште Бремен до Порт Саид во Египет. На бродот имало околу 3.000 автомобили, според холандската телевизија НОС, а пожарот најверојатно избувнал во еден од 25-те електрични автомобили на бродот.
-Екипажот сам се обидел да го изгасне пожарот, но не успеал. Едно лице загина, а неколку се повредени, се вели во соопштението од крабрежната стража.
Бродот кој превезувал автомобили, сѐ уште гори на околу 50 километри северно од холандскиот остров Амеланд.
