Пјонгјанг го осуди американскиот план: „Ова е најнескриената нуклеарна уцена“
Пјонгјанг го осуди планираното распоредување на американска подморница со нуклеарно оружје на Корејскиот полуостров, нарекувајќи го „најнескриената нуклеарна уцена на Северна Кореја“.
Северна Кореја денеска го осуди планираното распоредување на американска подморница со нуклеарно оружје на Корејскиот полуостров, нарекувајќи го сериозна закана за регионалната и глобалната безбедност.
Истовремено, таа предупреди дека американски извидувачки авион овој месец повеќепати го нарушувал нејзиниот воздушен простор и се закани дека таквите авиони може да бидат соборени во иднина.
Портпаролот на Министерството за одбрана на Северна Кореја го осуди планираното распоредување на американска подморница со нуклеарно оружје на Корејскиот полуостров, нарекувајќи го „најнескриената нуклеарна уцена на Северна Кореја“ која претставува сериозна закана за регионалната и глобалната безбедност.
Тој, исто така, предупреди дека САД ги засилиле своите извидувачки активности и извршиле неколку „провокативни летови“ овој месец, при што еден од извидувачките авиони наводно неколку пати го нападнал воздушниот простор на Северна Кореја над Источното Море, јавува француската новинска агенција АФП.
„Нема гаранција дека таква шокантна несреќа како што е соборувањето на стратешко извидувачки авион на американското воено воздухопловство нема да се случи во Источното море на Кореја“, предупреди тој, наведувајќи ги минатите инциденти кога Пјонгјанг собори американски авион.
Истовремено, тој додаде дека сегашната ситуација јасно докажува дека „ситуацијата на Корејскиот полуостров се приближува до прагот на нуклеарен конфликт поради американските провокативни акции“.
Во април, американскиот претседател Џо Бајден и неговиот јужнокорејски колега, Џун Сук Џеол, постигнаа договор за безбедносна соработка што вклучува планови за американски нуклеарно вооружени подморници да се приклучат во Јужна Кореја за прв пат по повеќе од 40 години. Се уште не е познат точниот датум кога американската подморница треба да го посети јужнокорејското пристаниште.
Во последно време се почести се различните тестови на оружје во Северна Кореја, поради што се зголемуваат тензиите на Корејскиот полуостров. Пјонгјанг, кој ја смета зголемената безбедносна соработка меѓу Вашингтон и Сеул како закана, минатата година изврши рекорден број тестови на оружје, а севернокорејскиот лидер Ким Џонг Ун ја прогласи земјата за неповратна нуклеарна сила.
