Во свлечиштата по обилните дождови во централна Кина, девет лица се водат како исчезнати, бидејќи тој дел од земјата се соочува со поплави и високи температури, соопштија локалните власти.
Пет лица се спасени од урнатините на градилиштето на автопат во централната провинција Хубеи, а спасувачите се уште трагаат по преживеани.
Десетици илјади луѓе се преместени во засолништа поради големите поплави во северна, централна и југоисточна Кина.
Сезонските поплави се редовна појава во Кина, но оваа година е придружена со невообичаено долги периоди на високи температури.
Претходно оваа недела, Пекинг забележа повеќе од девет последователни денови со температури над 35 степени Целзиусови, низа невидена од 1961 година.
Властите издадоа здравствени предупредувања во главниот град и на други места наредија стопирање на работата на отворено, иако многу работници продолжија да доставуваат пакети и стоки.
Досега се пријавени два смртни случаи во Пекинг од горештините.
Здравствените власти во Шаоксинг, град во провинцијата Жеџијанг, во четвртокот рекоа дека регистрирале смртни случаи поврзани со топлина, но не дадоа никакви детали.
Тешката суша во северна Кина ги загрозува посевите и ја оптоварува електричната мрежа, предупредија во четвртокот метеоролошките власти.
Во исто време, силните поплави во јужна Кина раселеа илјадници луѓе во последните неколку недели.
