Србија повторно се бори со водената стихија. Обилните врнежи предизвикаа излевање на реките и поплави во поголем дел на земјата. Во 35 градови и општини е прогласена вонредна додека пожарникарите, спасувачите и членовите на итната помош ги евакуираат луѓето и се обидуваат да ги поправат оштетените мостови и патишта. Под вода е дури и познатиот планински туристички центар Златибор каде речиси се е поплавено, а фотографиите направени деновиве покажуваат застрашувачка глетка.
Сообраќајот е во прекин на некои регионални патишта кај Чачак, Краљево, Крагуевац и Јагодина во централна Србија, соопшти Автомото сојузот на Србија (АМСС).
Во близина на Краљево водата го однела мостот на Ибарската магистрала во градот Адрани, па сообраќајот на тој пат кон Чачак и западна Србија е во прекин.
Во Крагуевац, најголемиот град во Шумадија, во текот на ноќта се излеа реката Лепеница, а спасувачите евакуираа 14 лица во чамци, меѓу кои и едно дете. Поплавен е и Клиничкиот центар во овој град и се примаат само итни случаи.
Во прогнозата на Републичкиот хидрометеоролошки завод се наведува дека до крајот на денот во поголем дел од Србија ќе врне дожд, посебно во централниот и јужниот дел на земјата, а во сабота врнежите треба да се намалат.
