Кинески научници објавија дека развиле нов тест за коронавирусот кој е сигурен како лабораториски ПЦР тест, но дава резултати во рок од четири минути.
Тестовите за полимеразна верижна реакција (ПЦР) се сметаат за најточни и најчувствителни кога станува збор за вирусот што предизвикува ковид-19, но резултатите обично се чекаат неколку часа.
Во некои земји, големата побарувачка за тестирање поради експоненцијалното ширење на високо преносливата варијанта омикрон резултираше со огромен заостаток во позитивни извештаи за пациентите. Научниците од Универзитетот во Шангај Фудан тврдат дека имаат решение.
Поставиле електромеханички биосензор
Во прегледана статија објавена во понеделникот во списанието „Nature Biomedical Engineering“, кинеските истражувачи објавија дека нивниот сензор, кој користи микроелектроника за да го анализира генетскиот материјал од брисовите, успева да ја намали потребата за долгорочни лабораториски тестови за ковид.
– Вградивме електромеханички биосензор за откривање на вирусот САРС-КоВ-2 во интегриран пренослив прототип на уред и откривме дека може да го открие РНК вирусот за помалку од четири минути – се вели во извештајот на кинеските научници. Тие рекоа дека нивниот метод нуди брзи резултати, лесна процедура и висока чувствителност, а исто така е и пренослив.
Во експериментите се користени примероци од 33 заразени лица во Шангај, а паралелно се правени и ПЦР тестови. Резултатите од нивниот метод беа целосно во согласност со резултатите од ПЦР тестовите, се вели во написот.
Немало лажно позитивни тестови
Студијата на 54 примероци опфати луѓе со треска кои немаат коронавирус, луѓе со грип и здрави волонтери. Немаше лажно-позитивни тестови, рекоа научниците од Фудан.
Уредот за тестирање се смета за посебен затоа што, откако целосно ќе се развие, може да се користи за брзо тестирање во различни ситуации, како што се аеродроми, здравствени установи, па дури и дома.
ПЦР тестовите се бавни и бараат лабораториска инфраструктура која е ограничена во многу земји, намалувајќи го бројот на тестови што може да се вршат на дневна основа. И додека брзите дијагностички тестови сега се достапни во многу делови од светот, тие генерално се помалку точни.
Кина е еден од најголемите светски производители на тестови за коронавирус. Според податоците на царината, земјата извезла тест комплети во вредност од 1,6 милијарди долари во декември, што е за 144 отсто повеќе од претходниот месец.
