Од извори во СПЦ, само неколку формалности ја делат Православната охридска архиепископија (ПОА) од целосна интеграција во Македонската православна црква (МПЦ-ОА), дознава Плусинфо.
Имено, владиците од ПОА денеска добиле отпуст кој треба да стапи на сила за време на првата заедничка литургија во Скопје или во Охрид на 5 јуни, вториот ден на празникот Педесетница (Духовден).
Како што и претходно објавивме, архиепископот охридски и митрополит скопски г.г. Јован од ПОА наводно ја прифатил титулата митрополит крушевско-демирхисарски во МПЦ-ОА, но засега сѐ уште не е познато дали тој ќе ја задржи и титулата „поранешен архиепископ“.
Според нашите извори од Белград, актуелниот епископ брегалнички г. Марко од ПОА најверојатно ќе биде епископ делчевско-каменички во МПЦ-ОА, а актуелниот епископ полошко-кумановски г. Јоаким ќе биде епископ илинденско-дељадровски во МПЦ-ОА.
Единствениот викарен владика во ПОА, епископот стобиски г. Давид, најверојстно ќе си остане викарен владика и во МПЦ-ОА, односно ќе му биде помошник на архиепископот г.г. Стефан. Неговата титула засега сѐ уште не е одредена, бидејќи во МПЦ-ОА веќе има еден епископ стобиски, г. Јаков.
