Лидерот на Социјалистичката партија на Србија, Ивица Дачиќ, критикуваше дел од опозицијата која, според него, ги злоупотребува двете неодамнешни масовни трагедии во Србија за политичка борба и повтори дека не е за предвремени избори.
Тој за Телевизија Прва изјави дека барањата на опозицијата немаат врска со борбата против насилството и посочи дека е поддржувач на политичкото единство и стабилност.
Дачиќ, кој е и министер за надворешни работи, рече дека парламентарните избори се одржаа минатата година во април и дека сега не гледа причина зошто тие да се одржат сега.
„Дали и на кој начин ќе се пристапи кон реконструкција на Владата никогаш не е спорно“, рече тој.
Тој потсети дека претседателот на Србија и Српската напредна странка Александар Вучиќ претходно зборувал за можност за промени во Владата во следната година.
