Воен авион се урна за време на рутинска обука во северозападна Индија. Две лица загинаа, а три се повредени.
Во северозападна Индија, воен авион МиГ-21 од руско производство удри во куќа за време на рутинска обука. Според локалната полиција, во несреќата две лица загинале на земја, а три лица се повредени.
Во меѓувреме пилотот се здобил со полесни повреди.
„Пилотот е спасен безбедно. Миг авион се урна во куќа. Две лица загинаа. Три лица се повредени“, изјави полицаецот Судхир Чаудари по несреќата во западната држава Раџастан.
Индиските воздухопловни сили (ИАФ) ја потврдија несреќата. „Пилотот безбедно се катапултирал и се здобил со полесни повреди. Покрената е истрага за да се утврди причината за несреќата“, соопшти ИАФ на Твитер.
Денешната несреќа е шеста во која учествува авион МиГ-21 од јануари 2021 година. МиГ-21 од руско производство влегоа во употреба во Индија во 1960-тите и со децении играа витална улога за воздухопловните сили на земјата. Голем број несреќи во изминатите неколку децении на овие авиони им ја донесоа етикетата на летечки ковчег поради лошата безбедност.
