Четири главни симптоми се поврзани со зголемен ризик од ран колоректален карцином, покажа новото истражување. Ова откритие е важно во контекст на се поголемиот број дијагнози на овој тип на рак кај луѓето помлади од 50 години.
Четири симптоми – абдоминална болка, ректално крварење, дијареа и анемија – беа наведени во новата студија, објавена во четвртокот. Студијата покажала дека симптомите се појавуваат дури две години пред дијагнозата на колоректален карцином, пишува Health.
„Колоректалниот карцином не е болест која ги погодува само постарите лица“, вели Јин Као, професор по хирургија. „Сакаме младите возрасни да бидат свесни за ризиците и да преземат акција доколку ги забележат овие многу јасни симптоми. Особено што ризикот за лицата под 50 години се смета за низок и тие не одат на рутински прегледи“.
Во студијата, истражувачите од Универзитетот Вашингтон во Св. Луис ги анализирал податоците за здравственото осигурување за повеќе од 5.000 пациенти на кои им бил дијагностициран овој тип на рак пред 50-тата година од животот. Целта беше да се откријат сите симптоми кои би помогнале да се дијагностицира ракот – особено кај помладата популација – што е можно порано. Овој карцином станува се почест кај помладата популација, а се открива само во напредна фаза. Помеѓу 1995 и 2019 година, процентот на случаи на овој рак кај луѓето на возраст од 55 или помлади се зголеми од 11 на дури 20 проценти, според податоците на Американското здружение за рак.
Истражувачите откриле дека ризикот од развој на колоректален карцином бил поголем кај пациенти кои пријавиле симптоми на абдоминална болка, ректално крварење, дијареа и/или анемија во три месеци до две години пред дијагнозата.
Колку повеќе симптоми има лицето, толку е поголем ризикот од дијагноза на рак: еден симптом речиси го удвојува ризикот, два го зголемуваат за повеќе од 3,5 пати и три или повеќе за повеќе од 6,5 пати.
Некои почнаа да забележуваат симптоми две години пред дијагнозата. Околу 19 проценти од пациентите го забележале својот прв симптом околу три месеци до две години пред дијагнозата; речиси 50 проценти го забележале првиот симптом три месеци пред дијагнозата.
Два симптоми – ректално крварење и анемија – се знаци дека е важно веднаш да се организира ендоскопско тестирање, рече Као.
Локацијата на ракот може да влијае на симптомите
Четирите симптоми веројатно се поврзани со местото каде што се развива ракот во дебелото црево и ректумот, особено кај помладата популација.
„Во повеќето случаи на рак на дебелото црево кај помладите пациенти, ракот се развива на левата страна на дебелото црево“, вели д-р Антон Билчик. „Ако е на левата страна, крварењето може да биде поочигледно, како и анемијата, во споредба со случаите на рак кои се развиваат на десната страна.
Неодамнешните истражувања покажаа дека се повеќе тумори се појавуваат на левата страна од телото, а раните дијагнози на колоректален карцином стануваат се почести.
„Веруваме дека ракот што се развива во долниот дел на дебелото црево има повеќе симптоми, бидејќи столицата е повеќе формирана – помалку течност – што значи дека е полесно да се забележи крварење“, вели колоректалниот хирург Алан Харзман. „Крварењето предизвикано од тумори лоцирани во горниот дел на дебелото црево е помалку забележливо бидејќи крвта се меша со столицата на својот пат низ тракт.
Разговор со доктор
Поверојатно е дека помладите луѓе, особено оние кои сè уште не ја достигнале возраста кога е неопходно да одат на редовни контроли, ќе ги игнорираат овие симптоми, а оваа одлука може да придонесе и за развој на болеста во подоцнежна возраст.
„Повеќето пациенти имаа симптоми со години, но ги игнорираа и веруваа дека се хемороиди. Ги бараа симптомите на Интернет и претпоставуваа дека нема да добијат рак“, вели гастроентерологот Ашкан Фархади.
Но, пациентите не се единствените кои треба да знаат за овие важни симптоми. „Клучот е да се шири свеста кај семејните лекари, гастроентеролози и лекарите за итни случаи“, вели Као.
Ако ги забележите овие симптоми, важно е да ги спомнете кај вашиот лекар што е можно поскоро.
„Бидејќи повеќето случаи на колоректален карцином кај луѓе под 50 години сè уште се откриваат само откако ќе се појават симптомите, од клучно значење е да се препознаат овие знаци и да се тестираат што е можно порано“, вели Као. „На овој начин болеста може да се дијагностицира порано, што може да ја намали потребата за поагресивни терапии, но и да ги зголеми стапките на преживување и квалитетот на животот на пациентите.
Овие симптоми може да бидат и показатели за други проблеми со дигестивниот тракт кои исто така треба да се третираат, како што е синдром на нервозно дебело црево или болест.
„Многу е невообичаено млад човек да забележи болка, дијареа и ректално крварење без ништо да се случи“, вели д-р Билчик. „Тоа може да биде нервозно дебело црево, рак или нешто друго. Во секој случај, не ги игнорирајте симптомите, дури и ако сте уште млади“.
