Во вторникот, Европската комисија ги наведе главните онлајн платформи кои ќе се соочат со построги правила за заштита на податоци и корисници.
Европската комисија соопшти дека ги усвоила првите одлуки за назначување според Законот за дигитални услуги, транспарентна регулатива за рекламирање на ЕУ која има за цел да им помогне на корисниците да бришат нелегална содржина и да се борат против дезинформациите.
Врз основа на податоците доставени од платформите во февруари, Европската комисија класифицираше 17 онлајн платформи и два пребарувачи како „многу големи“ бидејќи повеќе од 45 милиони луѓе ги користат секој месец.
Facebook, Instagram, LinkedIn, Pinterest, Snapchat, TikTok, Twitter и YouTube се класифицирани како „многу големи онлајн платформи“.
Нова класификација добија и шопинг веб-страниците Alibaba, Amazon, Apple AppStore, Booking.com, Google Play, Google Shopping и Zalando, како и Google Maps и Wikipedia.
Google и Bing се регистрирани како многу големи пребарувачи.
Новите правила имаат за цел подобро да ги заштитат личните податоци од агресивни тактики за рекламирање и ќе бараат од компаниите побрзо да дејствуваат против нелегалната содржина или дезинформациите.
На пример, рекламите не можат да се прикажуваат врз основа на чувствителни кориснички податоци, како што се политички ставови или сексуална ориентација.
Ќе бидат забранети и насочени реклами засновани на профилирање на деца.
Платформите ќе треба да им олеснат на корисниците да пријават нелегална содржина и ќе бидат обврзани да ја модерираат или избришат за многу краток временски период.
Во рок од четири месеци, платформите ќе треба да ги променат своите политики за да ги исполнат новите обврски според Законот за дигитални услуги.
Доколку компаниите не ги почитуваат прописите, ЕУ може да изрече казна од шест отсто од нивниот годишен промет и да ги забрани нивните услуги доколку постојано ги прекршуваат правилата.
