Денеска напладне во Базиликата на Светиот Гроб во стариот град на Ерусалим, државата Израел започнува церемонијата „преземање на Благодатниот оган во Ерусалим“, на која за првпат свое учество има македонско-црковна делегација предводена од министерот за внатрешни работи Оливер Спасовски, министерката за култура Бисера Костадиновска-Стојчевска, директорот на Државната комисија за односи со верските заедници и религиозни групи, Даријан Сотировски, како и шефот на делегацијата на Македонската православна црква – Митрополит тетовски-гостиварски, Јосиф Тодоровски.
Како што соопшти владината прес-служба, на овој голем чин кој се одржува секоја година на Велика Сабота има претставници од повеќе држави кои со владини и црковни почести, го пренесуваат светиот оган во своите земји.
Во пресрет на овој историскиот настан за македонската држава, нејзините граѓани и за МПЦ-ОА, министерот за внатрешни работи Оливер Спасовски од Ерусалим рече дека му причинува чест и задоволство што ја предводи делегацијата на македонската Влада и на Македонската православна црква – ОА којашто за прв пат ја има честа да го преземе Благодатниот оган директно од Ерусалим.
– Ова е историски чин кој се случува веднаш по воведувањето во канонско единство и признавање на нашата света црква, ова е прва година во којашто директно од Храмот со благослов на Патријархот Ерусалимски, ќе можеме да го преземеме огнот и да го однесеме во Македонија – рече Спасовски, додавајќи дека тоа е значајно за верата, значајно е за државата, за нашите граѓани, значајно е за нашата црква која веќе се вбројува во големото православно семејство.
Спасовски истакна дека македонската делегација синоќа присуствуваше на вечерната служба.
– Нашата црковна делегација беше дел од сите црковни великодостојници овде во Ерусалим, се поклонивме на гробот на нашиот Бог Исус Христос и мислам дека е укажана голема чест и на државата и на македонскиот народ, на граѓаните кои живеат во нашата земја и секако на МПЦ-ОА – рече тој.
„Прв пат имаме шанса директно од Ерусалим да го однесеме дома Благодатниот оган, во нашата држава, да го предадеме во МПЦ, и потоа, тој оган ќе продолжи да ни ги осветлува и домовите и храмовите во текот на целата година“, изјави министерката за култура Бисера Костадиновска-Стојчевска пред денешната церемонија на „Преземање на Благодатниот оган“ во Базиликата на Светиот Гроб во стариот град на Ерусалим, Државата Израел.
Ова е историски чин за македонската држава, за граѓаните и за МПЦ-ОА, се согласија членовите на високата македонска државно-црковна делегација која присуствуваше и на утрената богослужба во храмот на Воскресението во Ерусалим на која чиноначалствуваше Неговата светост, Патријархот Ерусалимски Теофил, во пресрет на големиот празник Воскресение.
Министерката за култура Костадиновска-Стојчевска истакна дека со Државата Израел ние досега имаме плодна соработка. Таа додаде: „Соработуваме не само на полето на културата, туку на полето на образованието, а се надевам дека таа соработка и понатаму ќе продолжи во сите сфери за кои ќе покажеме взаемен интерес за размена наискуства. Потребно е да продолжиме да учиме едни од други, да учиме не само во областа на религијата, туку да учиме и во областа на културата, да учиме за хуманоста за човештвото, за победата на животот и за тоа како да бидеме подобри во она што го правиме на секојдневна основа“, рече министерката Костадиновска-Стојчевска во пресрет на големиот чин за православните христијани.
По попладневната церемонија на „Преземање на Благодатниот оган“, македонската делегација вечерва ќе пристигне во Скопје, од каде што светата светлина ќе биде пренесена до МПЦ-ОА, и ќе биде раширена до сите епархии и храмови во земјава. Пренесувањето на Благодатниот оган е чин на голем благослов за сите православни христијани, за здравје, успех.
