Стотици луѓе беа уапсени во четвртокот во Франција на новите протести против пензиските реформи.
Насилни сцени се случија во четвртокот во Бордо, Нант и Рен, а полицијата употреби солзавец за да ги растера демонстрантите во Париз.
Премиерката Елизабет Борн насилството и оштетувањето на имотот ги нарече неприфатливи. Насилството го осуди и генералниот секретар на синдикатот Лоран Бергер.
„Кога ги напаѓаме симболите на Републиката, градското собрание, полициската станица, почнуваме да се напаѓаме еден со друг“, изјави тој за телевизијата РТЛ, нагласувајќи дека насилството ја става сржта на протестот на втор план. Тој посочи и дека не мисли оти контролата врз протестите им бега од рацете на синдикатите, па повика на пауза во реформата.
„Сега мораме да ги смириме работите, пред да се случи трагедија“, предупреди тој.
Министерот за внатрешни работи во петокот за телевизијата CNews изјави дека се уапсени 457 лица, а повредени се 440 припадници на безбедносните сили. Во Париз демонстрантите подметнаа околу 900 мали пожари, а пожари имаше и пред градското собрание во Бордо и полициската станица во Лориен.
Министерството објави дека 1,09 милиони луѓе излегле на улиците во четвртокот. Синдикатот CGT тврди дека имало 3,5 милиони луѓе.
Демонстрантите го блокираа пристапот до железничките станици, патиштата и дел од аеродромот Шарл де Гол. Во петокот, воздухопловната управа ги повика авиокомпаниите да откажат 33 отсто од летовите од Париз во недела и 20 отсто во петок поради штрајк на контролорите на летање, пишува Le Monde.
Синдикатите повикуваат на протести во вторник, за време на посетата на британскиот крал Чарлс Трети.
Штрајковите и протестите против пензиската реформа се мирни со недели, но во последните денови тие се повеќе прераснаа во насилство.
Французите излегуваат на улица за реформа со која постепено ќе се подигне старосната граница за пензионирање од 62 на 64 години, како и против политиките на владата на Емануел Макрон воопшто.
Спорот се интензивираше минатата недела кога владата го протурка предлог-законот во Народното собрание без гласање.
Во понеделникот вечерта пропаднаа две барања за гласање недоверба на Владата, по што беше усвоена реформата.
Таа одлука сега ја доведува во прашање Уставниот совет, но не е одреден рок до кога треба да донесе пресуда. Макрон сака реформата да стапи на сила до крајот на годината.
Реформата беше „многу тешка“, рече претседателот во телевизиско интервју во средата.
„Бараме од луѓето да се потрудат. Тоа никогаш не е популарно“.
Сепак, продолжи Макрон, меѓу анкетите и краткорочното планирање и општиот интерес на земјата, тој го избира општиот интерес на земјата, рече тој, бранејќи ја реформата.
