Тренерот на Барселона Чави ја прокоментира победата на Каталонците против Реал Мадрид од 2:1, во натпреварот од 26. коло на Ла Лига.
„Доминиравме и создадовме повеќе шанси. Заминувам среќен. Тимот е исцрпен од многу работа во одбрана и напад. Ова е многу важна победа за нас. Ја контролиравме играта. Знаевме како да се извлечеме од тешките ситуации. Голот што го примивме беше резултат на нашата концепциска грешка. Мислам дека бевме подобри во целина“, изјави Чави, кој на прашањето за коментар за настанот во 81. минута, кога беше поништен голот на Реал, рече:
„Тоа беше чист офсајд. Бев изненаден од зборовите на Анчелоти, кој вели дека немало офсајд. Резултатот е фер и затоа ми се допаѓа ВАР. Без него се е многу потешко, а со него резултатот е поправеден“, додаде Чави.
Следниот натпревар на Барселона во Ла Лига е против борбениот Елче. Овој натпревар е закажан за 1 април, а неколку дена подоцна Каталонците повторно ќе играат со Реал Мадрид, во реванш полуфиналето на Купот на Шпанија.
