Раперот почина откако колабираше на сцената на средината на изведбата
Јужноафриканскиот рапер Коста Тич ненадејно почина викендов, објави неговото семејство на Инстаграм. Смртта следеше неколку часа по неговиот настап на музичкиот фестивал. Музичарот, чие вистинско име е Константинос Цобаноглу, имаше 28 години. Не е наведена причина за смртта.
„Смртта трагично ни тропна на вратата, ни ги зеде саканиот син, брат и внук. Со длабока тага мораме да ја објавиме неговата смрт. Како семејство ни претстои тежок период додека се обидуваме да разбереме што ни се случи и бараме време и простор да се собереме. Благодарни сме на сите служби за итна помош и на сите што беа присутни во неговите последни часови“, соопшти неговото семејство.
Викендов колабирал на сцената на фестивал
Раперот колабирал за време на настап на фестивалот „Ултра Јужна Африка“ во Јоханесбург. На видеото кое се појави на социјалните мрежи се гледа дека Коста паднал на бината и бил подигнат од некој кој стоел до него. Откако станал, поминале неколку секунди и раперот повторно колабирал.
Организаторите на фестивалот велат дека се уништени од смртта на младиот рапер. Велат дека бил талентиран рапер, пејач, танчер, текстописец и голем пријател на фестивалот.
Коста беше сензација во подем во Јужна Африка. Тој е роден во Нелспруит, на северо-источниот дел на Јужна Африка, и веќе имал успешна танцова кариера пред да стане рапер.
Песната на Биг Флекс го направи ѕвезда низ Африка, пренесува Index.hr.
