Директорот на ФБИ, Кристофер Вреј, во вторникот изјави дека агенцијата проценила дека пандемијата на коронавирус најверојатно била предизвикана од инцидент во лабораторија во кинескиот град Вухан.
„ФБИ веќе некое време проценува дека изворот на пандемијата е најверојатно потенцијален лабораториски инцидент во Вухан“, изјави Вреј за Фокс њуз.
Неговата изјава уследи по неделниот извештај на Wall Street Journal, според кој американското Министерство за енергетика проценило со мала доверба дека пандемијата е предизвикана од случајно истекување на вирусот од кинеска лабораторија.
Некои агенции веруваат дека пандемијата е поверојатно резултат на природен пренос од животни на луѓе, а некои се неодлучни, објави Журнал.
Портпаролот на Белата куќа за национална безбедност Џон Кирби во понеделникот рече дека американската влада нема конечен заклучок и консензус за потеклото на пандемијата.
Кинеското Министерство за надворешни работи се повика на извештаите на Светската здравствена организација и Кина, кои укажуваат на природното потекло на пандемијата, а не на истекување од лабораторија.
Вреј рече дека не може да даде многу детали за проценката на агенцијата, бидејќи тоа е доверлива информација.
Тој ја обвини кинеската влада дека „прави се што може за да се обиде да ги попречи и замагли“ напорите на Соединетите држави и другите земји да дознаат повеќе за потеклото на пандемијата.
