Германските пратеници се борат да се загреат бидејќи во Бундестагот температурите паднаа на 18 степени поради мерките за штедење, пишува Шпигел. Слика во која министерката за семејни прашања Лиза Паус седи во капут го обиколи интернетот. „Стана студено, непријатно студено“, пишува весникот во статија под наслов „Ледена доба во парламентот“.
Некои од пратениците веќе почнале да се жалат дека тоа е штетно за здравјето.
– Седев во јакна во канцеларијата и постојано трчав наоколу. Сепак, по кратко време веќе имав ладен нос – раскажува Ренате Куенаст од Партијата на зелените.
Се вели дека температурите во германскиот парламент значително се намалиле пред нешто повеќе од една недела. Во канцеларијата на Ренате, термостатот покажа 18,2 степени Целзиусови, иако таа вели дека претходниот ден било уште поладно.
Поранешната министерка за земјоделство додаде дека на некои нејзини колеги им е уште полошо на нивните работни места, што потенцијално го загрозува нивното здравје.
Според законот за заштеда на енергија предложен од Роберт Хабек, вицеканцелар и министер за економски прашања и климатски активности, а усвоен од парламентот уште во август, температурите во нестанбените владини згради, вклучително и Бундестагот, треба да се одржуваат на 19 степени, при што ходниците воопшто не се загреваат.
Извештајот на Шпигел доаѓа во време на акутна енергетска криза во Германија, бидејќи ЕУ се стреми да се одвикне од руските енергетски резерви. Според портпаролот на Кремљ, Дмитриј Песков, овие политики ќе доведат до „многу жални последици“ за блокот, меѓу кои и 20 години на деиндустријализација, односно, откажување од индустријата.
