Обвинителството на Сан Антонио поднесе обвинение за тројца мажи, кои полицијата ги поврза со смртта на 51 мигрант пронајдени во приколка од камион.
Обвинети се Хуан Клаудио Д’Луна-Мендез и Хуан Франциско Д’Луна-Билбао, кои во моментов се теретат за незаконско поседување оружје и нелегален престој во САД, но се претпоставува дека наскоро ќе се соочат со далеку посериозно обвинение за илегална трговија со луѓе и предизвикување на смрт на 51 лице.
Кривичните пријави се поднесени во понеделникот, истиот ден кога мигрантите биле пронајдени во камион во кој немало клима и вода.
Полицијата успеала да ги лоцира мажите откако ја следеле адресата на која бил пријавен камионот и забележале дека возило ја напушта куќата. Возачот е идентификуван како Д’Луна-Билбао и имал огнено оружје во автомобилот, се вели во соопштението. Во истата куќа, полицијата забележала друг камион чиј возач, помлад маж, кој бил идентификуван како Д’Луна-Мендез.
Двајцата се мексикански државјани кои илегално престојуваат во САД.
Третиот осомничен, опишан како американски државјанин, кој го управувал камионот, исто така, е приведен и се очекува да му биде поднесена кривична пријава, но тој е во болница од вторникот вечерта.
Најмалку 22 лица, чии тела беа пронајдени во камионот, се мексикански државјани. Меѓу загинатите има седум Гватемалци и двајца од Хондурас. Но идентификацијата на починатите оди тешко, оти пронајдените жртви се без документи за идентификација, а во еден случај жртвата имала украдена лична карта. Се препоставува дека жртвите се од оддалечени села во кои нема телефонска услуга за да се стигне до членовите на семејствата и да се утврдат исчезнатите мигранти. Податоците за отпечатоци од прст треба да се споделат и да се усогласат од различни влади.
Мигрантите починале во камионска приколка во Сан Антонио, Тексас, каде температурата тој ден достигнала 39,4 степени Целзиусови.
