Сите 40.000 земјоделци кои се стекнале со право за субвенции, ќе добијат авансна исплата на 30 проценти од субвенциите, во текот на следната недела. Вака одлучи Владата на денешната 213-та седница. Ваквата исплата ќе биде авансно извршена за прв пат досега. Исто така рокот за пријавување за дополнителните 70 отсто субвенции е продолжен пет дена, односно до 30 декември, а сумата ќе зависи од тоа колкава количина производство ќе пријават земјоделците.
Исто така, Владата одлучи авасна исплата од 30 проценти да добијат и лозарите со што навремено ќе бидат поддржани лозовите насади. Ова е нов модел на субвенционирање кој беше усвоен.
Земјоделците можат да аплицираат во Агенцијата за финансиска поддршка на земјоделството и руралниот развој.
Владата исто така денеска одлучи да одвои 30 милиони денари за реконструкција на спортската сала „Работнички“-Градски Парк во Скопје со што ја задолжи Агенцијата за млади и спорт средствата да ги префрли на посебна наменска сметка на Општина Центар.
„Станува збор за 30.000.000 денари, што согласно владината одлука, се наменети за реконструкција на спортска сала „Работнички“ – Градски парк, општина Центар, во Скопје. Задолжена е Агенцијата за млади и спорт, средствата да ги префрли на посебна наменска сметка на Општина Центар“, се наведува во соопштението.
