Во рамки на проектот „Инклузија на децата Роми во предучилишно образование“ денеска се потпишаа трипартитните договори за соработка помеѓу Министерството за социјална политика, демографија и млади, 21 општина и детските градинки во тие општини.
Со Договорите за соработка се овозможува бесплатен престој и згрижување на околу 350 деца Роми во детските градинки, а тоа е обезбедено преку блок дотациите што Министерството им ги доделува на општините.
Министерот за социјална политика, демографија и млади Фатмир Лимани информираше дека во текот на изминатите 16 години од имплементацијата на проектот биле вклучени бесплатно повеќе од 5.000 деца од ромската етничка заедница во 20 општини, со ангажирани 20 негувателки Ромки кои работеле со овие деца олеснувајќи им го процесот на интеграцијата во градинките.
– Важно е да се напомене дека ромските деца не беа сместени во сегрегирани групи во градинките, туку во интегрирани групи заедно со децата од другите заедници кои живеат во Република Северна Македонија. Во секој Извештај за прогресот на Република Северна Македонија на Европската комисија, овој Проект беше посочуван како успешен модел за зголемување на нивото на образование кај ромската популација – рече Лимани.
Тој посочи и дека проектот придонел за зголемување на стапката на запишување на децата во прво одделение, но и како држава да станеме лидер во регионот со најголем број вклучени деца Роми во сите нивоа на образование.
Од 2019 година со препорака на Владата овој Проект се имплементира преку системски пристап со вклучување на општините, за ослободување од партиципација на родителите на децата Роми што се во социјален ризик.
– Вложувањето во образованието на децата Роми е од суштинско значење и придонесува кон побрза интеграција на Ромската заедница во општеството. Образованието на Ромите ја прикажува реалната слика и нивото на нашата култура како општество и држава – порача Лимани.
Општина Центар и оваа година ќе запише 20 дечиња од ромска националност на возраст од 3 до 6 години во градинката „Раде Јовчевски – Корчагин“.
