Министерот за одбрана на Босна и Херцеговина, Зукан Хелез изјави дека добил неофицијални информации дека 20 лица загинале во поплави и лизгање на земјиште во општина Јабланица на северот на Херцеговско-неретванскиот кантон.
Бројката на загинатите сè уште не е официјално потврдена од полицијата, но во своите изјави надлежните рекоа дека има загинати, како и многу исчезнати и повредени луѓе.
Од кантоналната болница „Д-р Сафет Мујиќ“ потврдија дека спасувачките екипи успеале да евакуираат жена во осмиот месец од бременоста која потоа била донесена во оваа болница. Бремената жена е оперирана и моментално е стабилна, но, за жал, го изгубила бебето.
Голем број екипи на Итна медицинска помош од Мостар се испратени во Јабланица. На теренот има бројни тимови за спасувачката служба кои се обидуваат да стигнат до жртвите.
Освен во Јабланица, поплавите и свлечиштата им предизвикаа сериозни проблеми и штети на жителите на општините Коњиќ, Кисељак, Фојница и Крешево. Цели населби се по вода, урнати се патишта, мостови и железнички пруги, нема интернет, ниту друга комуникација.
Во тек се спасителни акции од тимови на сите институции во Босна.
Од погодените места во Босна постојано стигнуваат фотографии и видеа кои го покажуваат огромниот размер на поплавите.
Albanian
English
Macedonian
Turkish
