Технолошкиот гигант Гугл (Google) го загуби спорот против паричната казна од Европската Унија (ЕУ) изречена поради начинот на кој компанијата врши дигитално рекламирање и ќе треба да плати 2,4 милијарди евра.
Судот на правдата на ЕУ ја потврди одлуката на понискиот суд, отфрлајќи ја жалбата против паричната казна од 2,4 милијарди евра наметната од Европската комисија за давање на компанијата незаконска предност во резултатите од пребарувањето на нејзините препораки за купување во однос на ривалите.
Комисијата го обвини Гугл дека ги насочува корисниците кон своите Google Shopping сервиси без право на пребарување, нанесувајќи им штета на конкурентските провајдери на истите услуги.
Тоа е една од трите казни од повеќе милијарди евра изречени на компанијата од страна на Европската комисија во последните 10 години.
„Разочарани сме од одлуката на Судот, која се однесува на многу специфичен збир на факти“, соопшти Гугл.
Компанијата уште во 2017 година тврдеше дека вовела промени во своето работење со цел да се усогласи со одлуката на Европската комисија, за која наведува дека работела добро.
Технолошкиот гигант има проблеми со однесувањето со конкуренцијата и во САД каде што во август сојузниот судија пресуди дека Гугл кој обработува 90% од американските интернет пребарувања, изградил нелегален монопол.
Компанијата беше обвинета дека плаќа милијарди долари годишно на фирми, вклучително и Apple и Samsung, за да се осигура дека тоа е нивниот стандарден пребарувач.
Американската влада сега размислува дали да побара од судијата да го растури гигантот за пребарувачи Гугл, во потег што би можел да го промени начинот на кој технолошките гиганти работат.
Владата може да побара од судија да го принуди Алфабет, мајка-компанија на Гугл да отфрли деловите од својот бизнис, како што се прелистувачот Chrome и оперативниот систем Андроид, за кои велат дека се користат за одржување на нелегален монопол во онлајн пребарување.
Како одговор, Гугл предупреди дека предложените промени би можеле да имаат несакани последици за американските бизниси и потрошувачите.
