Познат по тоа што е одличен извор на селен, но тоа не е се.
Ако сакате крцкави, солени грицки, дефинитивно треба да ги вклучите бразилските ореви во вашата исхрана. Освен што се многу вкусни, полни се и со хранливи материи.
Покрај тоа што се преполни со протеини, влакна, ниацин и витамин Б6, бразилските ореви содржат и еден тон минерали, вклучувајќи магнезиум, калиум и цинк.
Бразилскиот орев стана омилена здрава храна ширум светот, особено благодарение на фактот што содржи голема количина селен – толку многу што во 2017 година беше прогласен за „најмоќен извор на селен во храната“.
Всушност, само еден бразилски орев содржи доволно селен за да ги задоволи вашите дневни потреби, вели регистрираната диететичарка нутриционист Сара Сковран. На возрасните мажи и жени им требаат 55 микрограми селен дневно, според Националниот институт за здравје на САД, а еден бразилски орев содржи неверојатни 96 микрограми, речиси двојно повеќе од препорачаната количина.
И зошто селенот е важен за нас? Тој е вклучен во бројни функции, како што се производство на тироидни хормони и синтеза на ДНК.
Нутритивен профил на два бразилски ореви:
66 калории
1 грам протеин
7 грама масти
1 грам јаглени хидрати
1 грам влакна
1 грам шеќер
Селенот е антиоксиданс. Тоа значи дека овој минерал може да се бори против слободните радикали и оксидативниот стрес, а со тоа го намалува ризикот од хронични заболувања. Слободните радикали се молекули кои во вишок може да ги оштетат клетките и да предизвикаат оксидативен стрес, што може да доведе до состојби како што се рак, срцеви заболувања и дијабетес тип 2.
Сепак, антиоксидансите делуваат така што ги менуваат слободните радикали на таков начин што тие стануваат безопасни. Бидејќи антиоксидансите го спречуваат оксидативниот стрес, тие исто така го намалуваат воспалението.
Но, селенот во бразилските ореви не делува сам. Бразилските ореви содржат витамин Е и супстанции наречени феноли, кои се антиоксиданти. Витаминот Е исто така ја поддржува функцијата на имунолошкиот систем.
Тие и помагаат на тироидната жлезда
Селенот во бразилските ореви, исто така, може да промовира здрава функција на тироидната жлезда. Тироидната жлезда произведува тироидни хормони кои ги регулираат телесните функции како што се метаболизмот и менструацијата. Имајќи го тоа на ум, здравјето на тироидната жлезда е критично за целокупното здравје, а селенот во бразилските ореви може да помогне.
Тие му помагаат на срцето
Бразилските ореви можат да помогнат и за здравјето на срцето, што делумно се должи на фактот дека се богати со селен. Како што споменавме погоре, оксидативниот стрес може да придонесе за срцеви заболувања, но антиоксидантните својства на селенот можат да помогнат да се намали ризикот. Бразилските ореви, исто така, нудат хранливи материи кои го намалуваат високиот холестерол во крвта и крвниот притисок, два главни фактори на ризик за срцеви заболувања.
Ги зајакнуваат коските
Бразилските ореви содржат малку калциум, кој е неопходен за здрави коски, како и магнезиум. Уште повеќе, „селенот во бразилските ореви ги активира ензимите кои ги штитат клетките за градење на коските познати како остеобласти“, вели нутриционистот Меган Вонг. Селенот, исто така, помага да се намали активноста на остеокластите, клетките кои ја раствораат коската.
Тие се добри за здравјето на мозокот
Придобивките од бразилските ореви се прошируваат и на вашиот мозок. Антиоксидантните ефекти на селенот можат да ги заштитат мозочните клетки од оксидативно оштетување. Ова е важно бидејќи оксидативниот стрес може да придонесе за когнитивно опаѓање поврзано со стареењето. Може да игра улога и кај невродегенеративните болести, како што е Алцхајмеровата болест, според студијата од 2019 година.
Важна претпазливост!
Бидејќи бразилските јаткасти плодови се богати со селен, треба да избегнувате редовно да ги јадете, препорачуваат лекарите. Ова може да доведе до акумулација на вишок селен во телото, што резултира со труење со селен. Раните знаци вклучуваат метален вкус во устата, лош здив, гадење, дијареа, губење на косата, кршливи нокти, осип на кожата и замор.
Значи, колку е премногу?
Максималната количина што можете да ја консумирате во еден ден без негативни несакани ефекти е наводно 400 микрограми за возрасни мажи и жени. Тоа се околу четири бразилски ореви, кои заедно содржат околу 384 микрограми селен. Во меѓувреме, истражувањето сугерира дека токсичноста на селен се јавува кога се земаат околу 1.200 микрограми – што е еквивалент на јадење 13 бразилски ореви. Со оглед на сето ова, се препорачува да јадете не повеќе од два бразилски ореви дневно за да останете во безбедни граници додека сеуште уживате во придобивките од селенот.
Исто така, можно е да бидете алергични на бразилски ореви, кои се еден вид јаткасти плодови, исто како и бадемите и индиските ореви, пренесува nova.rs.
