Во основното училиште во Перушиќ наставата била прекината по интервенција на родителите поради наводна закана од еден од учениците кон други ученици и професори, пренесува Индекс.хр
ХРТ објави дека 14-годишното момче се заканувало дека ќе состави список на оние со кои ќе се пресмета, а како што неофицијално дознаваат полицијата од станот во кој живее малолетникот го запленила оружјето. Покрената е истрага.
– Службите си ја вршат својата работа, институциите се навремено информирани. Жал ми е за нашите ученици и родители кои со право се загрижени, но се надевам дека ќе се реши позитивно – изјави Снежана Милковиќ, директорка на училиптето во Перушиќ.
Родителите исплашени за безбедноста на своите деца решиле да ги вратат дома и да не ги пуштаат на училиште додека не се реши ситуацијата.
– Поради стравот, поради информациите што беа пренесени, решивме денеска да ги вратиме децата од училиште и да ги оставиме дома до понатамошно известување, додека не видиме што ќе преземе полицијата за случајот – изјави мајката на еден од учениците за ХРТ.
Инцидентот во Хрватска потсети на масакрот што се случи на 3 мај минатата година во белградското основно училиште „Владислав Рибникар“ кога тогаш 13-годишниот ученик Коста Кецмановиќ уби 9 ученици и чуварот на училиштето.