Северноатлантскиот сојуз НАТО објави информации за тоа колку од својот бруто домашен производ трошеле земјите членки за одбраната во 2023 година. Анализата доаѓа во време кога поранешниот американски претседател Доналд Трамп коментираше дека САД може и да одбијат да ги бранат земјите кои не го платиле својот дел ако тој повторно биде избран за претседател.
Македонија со процент од 1,87 отсто е меѓу земјите кои уште не стигнале до договорените 2 отсто од БДП, а такви се и Франција (1,9 отсто), Црна Гора (1,87 отсто), Бугарија (1,84 отсто), Хрватска (1,79 отсто), Албанија (1,76 отсто), Холандија (1,7 отсто)….
Оние кои досега ја постигнаа и ја надминаа целта се Полска (3,9 отсто), САД (3,49 отсто), Грција (3,01 отсто), Естонија (2,73 отсто), Литванија (2,54 отсто), Финска (2,45 отсто), Романија (2,44 отсто), Унгарија (2,43 проценти), Латвија (2,27 проценти), Обединетото Кралство (2,07 проценти) и Словачка (2,03 проценти).
Луксембург е најмал трошач, со 0,72 отсто од БДП, иако со оглед на неговата мала големина има своја цел да потроши 2 отсто од бруто националниот приход за својата војска. Исланд нема своја војска, па затоа не е вклучен во бројките.
Дека земјите од Алијансата треба да трошат барем 2 отсто од БДП за своите воени сили беше договорено уште во 2014 година на самитот во Велс.
Генералниот секретар на НАТО, Јенс Столтенберг предупреди дека забелешките на Трамп „ги ставаат американските и европските војници на зголемен ризик“.
