Не сакам никого да плашам, но ситуацијата не е добра ни во Украина ни тука, рече претседателот на Србија Александар Вучиќ синоќа на телевизија Пинк каде зборуваше за политичката ситуација во светот, војната во Украина, економските тешкотии и за претстојните избори.
– Кога имате ваква ситуација во светот, таман сте помислиле дека сте направиле сè на внатрешен план, сепак не сте направиле ништо, утре доаѓа нов проблем – рече тој и додаде дека не може да се каже дека ќе се живее полесно и поубаво кога има војна во соседството.
Тој рече дека постојат безброј проблеми и дека мора да се гледа во иднината бидејќи никој не гарантира колку време лошата ситуација во светот ќе потрае.
– Кога сакате да направите нешто во ваков момент, мора да сфатите дека ништо повеќе не е исто. Мал дел од луѓето се радуваат. Најавија собири – едните ја поддржуваат Украина, други Русија – наместо сите да молчат – рече тој, истакнувајќи дека нема да дозволи едни со други да се судрат.
Вучиќ повтори дека не се знае што носи утре. Според него, економските, политичките и општествените последици се несогледливи.
– Ова е најтешкиот конфликт за Европа и светот по Втората светска војна – вели Вучиќ.
