Спасувачите се тркаат со времето за да ги ископаат можните преживеани од урнатините на уништените села на планините Атлас во Мароко, три дена по најсилниот земјотрес во земјата досега, пренесува АФП.
Во земјотресот со јачина од 6,8 степени според Рихтеровата скала што ја погоди областа југозападно од градот Маракеш доцна во петокот загинаа повеќе од 2.100, а повредени се повеќе од 2.400, многумина со сериозни повреди, според официјалните податоци ажурирани доцна во неделата.
Рабат во неделата објави дека прифатил понуди за помош од четири странски земји, додека многу други земји исто така рекоа дека се подготвени да испратат помош.
Властите позитивно одговорија „во оваа фаза“ на понудите на Шпанија, Британија, Катар и Обединетите Арапски Емирати „да испратат тимови за пребарување и спасување“, соопшти МВР.
Министерството забележува дека странски тимови биле во контакт со мароканските власти за да ги координираат напорите, наведувајќи дека само четири понуди биле прифатени бидејќи „недостатокот на координација може да биде контрапродуктивен“.
Други понуди би можеле да бидат прифатени во иднина „доколку се развијат потребите“, велат од министерството.
