Државјанин на Таџикистан на 43-годишна возраст е човекот кој денеска отвори оган на аеродромот во главниот град на Молдавија, Кишињев, двајцата загинати се полицајци, а еден цивил е ранет – објави молдавскиот премиер Дорин Речеан.
Напаѓачот отворил оган на терминалот, но подоцна бил ранет и уапсен во полициска акција. Во моментов се наоѓа во болница, напиша премиерот Речеан нa Фејсбук.
Како што пренесуваат светските агенции, напаѓачот пристигнал од Турција со авион, а потоа му бил одбиен влез во земјата. Додека бил придружуван од гранични службеници, тој успеал да му го грабне пиштолот на еден од нив и почнал да пука. Зел неколку патници како заложници и успеал да се забарикадира во една од просториите. Сепак, полицијата успешно реагирала и го совладала напаѓачот при што го повредила. За време на акцијата сите летови беа откажани, а патниците евакуирани.
