Командантот на руската Црноморска флота и еден од највисоките офицери на руската морнарица, Виктор Соколов, е снимен како учествува на видео конференција во вторникот, само еден ден откако украинските специјални сили соопштија дека го убиле.
На фотографијата објавена од руското Министерство за одбрана, Соколов е прикажан како наводно учествува на видео конференција со министерот за одбрана Сергеј Шојгу и други врвни адмирали и воени команданти.
Припадниците на украинските специјални сили во понеделникот објавија дека го убиле рускиот врвен адмирал Соколов на Крим, заедно со уште 33 офицери во минатонеделниот ракетен напад врз седиштето на руската Црноморска флота во пристаништето Севастопол.
Кремљ во вторникот соопшти дека нема информации дека командантот на Црноморската флота починал.
Официјален Киев ден претходно објави дека бил убиен од украинските специјалци во напад на Крим.
„Нема информации за оваа тема од Министерството за одбрана“, изјави за новинарите портпаролот на Кремљ, Дмитриј Песков.
