Новиот кинески премиер Ли Чианг најави дека исполнувањето на целта од пет отсто економски раст нема да биде лесна задача. На крајот од еднонеделната сесија на Конгресот, тој беше критичен и кон САД во светло на тензичните односи, но во исто време повика на соработка меѓу двете земји.
Кинескиот народен конгрес денеска одобри цел за економски раст од околу пет отсто, но новиот кинески премиер Ли Чианг предупреди дека тоа нема да биде лесно да се постигне. Целта е една од најниските во последните неколку децении; Кина минатата година сакаше да постигне раст од 5,5%, но на крајот, во светло на последиците од строгите антикорона мерки и кризата на пазарот на недвижности, забележа 3%.
Ли, еден од најблиските сојузници на претседателот Кси Џинпинг, кој беше потврден како премиер минатиот викенд, предупреди денеска на тешкотии во постигнувањето на целта повторно оваа година. „Се плашам дека постигнувањето на целта за раст од пет проценти нема да биде лесна задача и ќе мораме да ги удвоиме нашите напори“, рече Ли на прес-конференцијата на крајот од седницата на Народниот конгрес.
„Стабилизирањето на економскиот раст е предизвикувачка задача не само за Кина, туку и за сите земји во светот“, рече Ли, како што пренесува германската новинска агенција dpa.
Кинескиот претседател Си Џинпинг планира следната недела да отпатува за Русија, каде се очекува да се сретне со рускиот претседател Владимир Путин, пренесува новинската агенција Ројтерс. Кси на тој начин ќе ја посети Русија порано од очекуваното.
Кина во зголемување на долгот. А односот со САД?
За да ја поттикне економијата, Кина планира малку да го зголеми долгот оваа година во однос на минатата година. Меѓу другото, буџетот кој денеска го одобрија нешто помалку од 3.000 делегати, предвидува 7,2 отсто повеќе пари за армијата во однос на геополитичките тензии.
Ли денеска ги издвои и САД, со кои Пекинг моментално ги има најлошите односи во последните децении во однос на трговијата, технологијата и безбедноста.
„Окружувањето и потиснувањето не се во ничиј интерес“, рече тој. „Кина и САД треба и мора да соработуваат. Кога Кина и САД работат заедно, можеме да постигнеме многу“, додаде тој, според француската новинска агенција АФП.
За прв пат откако Конгресот му додели трет мандат за шеф на државата, Си Џинпинг исто така им се обрати на делегатите, нагласувајќи ја важноста од зајакнување на националната безбедност. „Безбедноста е лулка на развојот, а стабилноста е предуслов за просперитет“, рече тој. Тој се залагаше за модернизација на војската за да стане челичен „Големиот ѕид на Кина“ за заштита на националниот суверенитет и безбедност. Тој, исто така, повика на консолидација на стабилноста во Хонг Конг и на обединување со Тајван, кој Кина го доживува како дел од својата територија. „Големото подмладување на кинеската нација влезе во неповратен историски процес“, верува тој и вети дека во неговиот трет мандат потребите на земјата ќе бидат негова мисија.
