Празното место во Државна изборна комисија (ДИК) останува спорно прашање, што предизвикува интензивни политички дискусии и закана за кривична пријава и улични протести од страна на Албанската опозиција- Европскиот сојуз за промени (ЕСП).
Неодамнешната средба на новоименуваниот претседател на Собранието, Јован Митрески, со пратениците од албанската опозиција не успеа да го надмине ќор-сокакот околу испразнетото место во ДИК. Политичката тензија го достигна својот врв додека двете страни се борат да постигнат консензус.
Од Кабинетот на Јован Митрески информираат за Канал 5 дека тој е подготвен да се вклучи во дополнителни консултации со сите парламентарни партии за да се најде решение кое ќе биде прифатливо за сите засегнати страни. Сепак, ќор-сокакот опстојува, оставајќи ја непополнета оваа позиција на ДИК, која припаѓа на албанската опозиција.
Од Европскиот сојуз за промени најавуваат и кривична пријава за претседателката на Комисијата за избори и именувања Марија Ѓорѓиевска бидејќи го кочи изборот. Пратеничката на СДСМ пак, не сака да ја коментира најавата за кривично гонење, но вели дека изборот на член на ДИК ќе биде ставен на дневен ред тогаш ќе се обезбедат 80 пратенички гласа за некој од кандидатите.
Од друга страна, од Алијанса на Албанците на Таравари сметаат дека ЕСП нема право на член во ДИК.
