Претседателот на Украина, Володимир Зеленски, предупреди дека штотуку завршените „лажни референдуми“ и обидите за анексија на украинска територија на Русија исклучуваат какви било разговори со Москва се додека Владимир Путин останува претседател и повика на „целосна изолација“ на Русија и нови остри глобални санкции, јавува Ројтерс повикувајќи се на Асошиејтед Прес.
Обраќајќи се до Советот за безбедност на Обединетите Нации преку видео-врска, Зеленски повика на дополнителна воена и финансиска поддршка за одбраната на Украина „за да загуби агресорот“ и „јасни и правно обврзувачки гаранции за колективна безбедност“ за неговата земја како одговор на наместени референдуми.
Украина свика итен состанок на Советот за безбедност за да одговори на референдумите и очекуваните најави за анексија од Русија.
– Секоја анексија во современиот свет е злосторство, злосторство против сите земји кои сметаат дека неприкосновеноста на границата е од витално значење – рече Зеленски.
Тој ја обвини Русија за уништување на „главниот дел од меѓународното право“ и за тоа дека таа „одговара на сите предлози за разговори со нова бруталност на бојното поле, со уште поголема криза и закани за Украина и за светот“.
– Признавањето на овие лажни референдуми од Русија како нормални, спроведувањето на таканареченото кримско сценарио и уште еден обид за анексија на украинска територија ќе значат дека нема што да се разговара со овој руски претседател – заклучува Зеленски.
Тој посочи дека „анексијата е еден вид потег што го става (Путин) сам против целото човештво“.
Многу членови на Советот за безбедност на ОН ги осудија референдумите и истакнаа дека било каква анексија на територијата никогаш нема да биде признаена.
Американската амбасадорка Линда Томас-Гринфилд најави дека САД и Албанија наскоро ќе достават резолуција до Советот за безбедност со која се осудуваат „лажните референдуми“, повикувајќи ги сите земји да не признаат каков било променет статус на Украина и барајќи итно повлекување на руските трупи од Украина.
Резолуцијата сигурно ќе се соочи со руско вето, „но се надеваме дека остатокот од Советот ќе биде силен и ќе одбие да го прифати преминот“, рече таа.
Американската амбасадорка рече дека очекува гласање во Советот за безбедност за резолуцијата кон крајот на оваа или почетокот на следната недела.
