Турција годинава од Русија купила јаглен произведен во анектираните делови на Украина во вредност од најмалку 13,38 милиони евра.
Ова доаѓа од податоците на руската царина што ги анализира агенцијата Ројтерс.
Според извештаите, во периодот од февруари до јули годинава во Турција пристигнале околу 160.400 тони јаглен од источните украински региони Доњецк и Луганск.
Оваа земја беше главната извозна дестинација за јаглен од припоените украински региони, со учество од 95%, наведува Ројтерс.
Во првата половина од годината, Анкара произведе 31,5 милиони мегават-часови електрична енергија од увезен јаглен, што е за 25% повеќе отколку во истиот период во 2022 година.
Продавачите на јаглен се регистрирани во Русија и на припоените украински територии, а купувачите не се турски компании, туку фирми регистрирани во Хонг Конг, Обединетите Арапски Емирати и офшор дестинации како Белизе или Британските Девствени Острови, се додава во анализата.
Турција, членка на НАТО, го поддржува територијалниот интегритет на Украина, но не воведе санкции кон Русија и не ја ограничи трговијата со Москва или со областите на Украина под контрола на Москва.
