Шведските власти објавија дека ја затвораат истрагата за експлозиите во септември 2022 година на гасоводите Северен тек 1 и 2, со кои се транспортира руски гас во Германија, бидејќи тие немаат надлежност.
Покрај Шведска, истрага за експлозиите водат и Данска и Германија. Јавниот обвинител Матс Љунгквист од шведското обвинителство во соопштение рече дека „истрагата била систематска и темелна“.
„Германската истрага продолжува, а поради тајноста што владее во меѓународната правна соработка, не можам дополнително да коментирам за соработката што се случи. Исто така, нема да можам дополнително да коментирам за заклучоците од шведската истрага или да коментирам за некои осомничени во шведската истрага“. – рече Љунгквист.
Тој додаде дека имал добра соработка со истрагата што ја водат германските власти.
Северен тек 1 и 2, два гасоводи кои беа поставени паралелно под Балтичкото Море, директно ги поврзуваа најголемиот производител на гас, Русија и најголемиот европски клиент, Германија. ;
Подморската експлозија го наруши Северен тек 1 и го оштети Северен тек 2, кој никогаш не профункционира бидејќи Германија го суспендираше процесот на сертификација непосредно пред Русија да ја нападне Украина во февруари 2022 година.
Освен геополитичкото влијание, истекувањето на гасоводот „Северен тек“ беше огромна еколошка катастрофа со зафатен локалниот див свет и огромни количини на метан ослободени во Балтичкото Море, што аналитичарите веруваат дека може да биде најголемото ослободување на метан од човековата активност.
