Постоечкиот Закон за здруженија и фондации дава можност секој да може да поднесе иницијатива за забрана на работата на организациите пред надлежен јавен обвинител.
Во членот 66 од Законот за здруженија и фондации се наведува дека ако надлежниот основен јавен обвинител според седиштето на организацијата по службена должност или по поднесената иницијатива оцени дека постојат причини за забрана на работата на организацијата во согласност со овој закон, ќе поднесе предлог до надлежниот суд. Постапката за забрана е итна, предвидува Законот.
Во членот 65 од Законот, пак, се предвидува во кои случаи се забранува работата на организациите. И тоа ако: нејзиното дејствување е насочено кон насилно уривање на уставниот поредок, поттикнување и повикување на воена агресија и разговрување на национална, расна или верска омраза и нетрпеливост, активности поврзани со тероризам или презема активности кои се спротивни на Уставот или закон и се повредуваат слободите и правата на други лица.
Претходно од Министерството за правда за МИА информираа дека работната група деновиве ќе закаже состанок на кој ќе се дискутира за новиот Закон за здруженија и фондации. Постоечкиот закон е донесен во 2016 година, а неговата примена во пракса покажа одредени слабости, оценуваат од Министерството.
Откако организации и институции деновиве реагираа за регистрацијата на бугарски здруженија во земјата, од Министерството за правда потенцираа дека до нив не е доставено барање за давање позитивно мислење за одобрение на името на здруженијата „Цар Борис Трети“ и „Цар Фердинанд“.
Во април годинава во Битола беше отворен Културниот центар „Ванчо Михајлов“, потоа беше регистрирано Здружението „Цар Борис Трети“ во Охрид, а се споделува и информација дека и во Богданци се подготвува ново бугарско здружение кое според најавите треба да го носи името на Цар Фердинанд, татко на Царот Борис III.
Еврејската заедница и Фондот на холокаустот на Евреите од Македонија пред неколку дена соопштија дека со регистрацијата на здружението „Цар Борис Трети“ во нашата држава се глорифицираат нацизмот, фашизмот и се шири говор на омраза.
