Рускиот волонтерски корпус (РДК), Легијата за слобода на Русија (ЛСР) и Сибирскиот баталјон продолжуваат со нападите во руските погранични региони Курск и Белгород.
„Трупите на Путин немаат каде да се сокријат“ – објавија борците од Легијата за слобода на Русија на Телеграм.
Поради исклучително тензичната ситуација во овие региони, кои бунтовниците или руските партизани ги нарекуваат борбени зони, започна евакуацијата на цивилното население и отворен е хуманитарен коридор за оние кои сакаат да ги напуштат своите места.
Според последните информации што бунтовниците ги објавија на нивните канали, до утринава повеќе од 7.600 цивилни возила ги напуштиле регионите Белгород и Курск. Оние кои не се евакуираа беа повикани да останат во засолништата и во нивните домови во наредните денови додека продолжуваат ограничените воени операции.
Бунтовниците најавија и дека по завршувањето на коридорот ќе продолжат да ги уништуваат воените објекти во Белгород и Курск „додека регионите целосно не се исчистат од војниците на Путин“.
Тие, исто така, ги обвинија силите на Путин дека користат „човечки штитови“, ставајќи ги во посебен ризик цивилите во овие погранични региони.
Руските режимски медиуми генерално, не известуваат за настаните во овие погранични региони, но ТАСС во четвртокот објави дека во Белгород е на сила предупредувањето поради можни ракетни напади и ги повика граѓаните да останат во засолништа.
Оваа информација ја пренесе и РИА Новости, како и изјавата на гувернерот на Белгород, Вјачеслав Гладков, кој тврди дека бројот на лажни вести е зголемен во последните 3-4 дена.
– Целта на непријателот е да уништи сè, да повреди, убива, да ги уништи нашите домови, но најмногу да не исплаши. Толку лажни информации немавме во последните две и пол години – рече Гладков и додаде дека нема причина за паника.
Сепак, фотографиите од официјалните агенции покажуваат дека ситуацијата во овие региони не е толку мирна како што тврди рускиот функционер. Може да се видат последиците од ракетниот истрел, а непотврдените видеа објавени од бунтовниците на социјалните мрежи, исто така, укажуваат на борби во овие области. Истовремено и самиот Гладков во средата потврди дека едно лице загинало, а тројца се повредени.
