Околу 2,3 милијарди долари и евра пристигнаа во Русија откако САД и ЕУ го забранија извозот на нивните банкноти во март 2022 година, по инвазијата на Украина, според царинските податоци што ги видел Ројтерс.
Досега необјавените податоци покажуваат дека Русија успеала да ги заобиколи санкциите кои го блокираат увозот на готовина и покажуваат дека доларите и еврата остануваат корисни за трговија и патувања, иако Москва се обидува да ја намали својата изложеност на тврди валути.
Податоците од царината, добиени од Ројтерс од комерцијален извор кој евидентира и собира информации, покажуваат дека готовината била префрлена во Русија од ОАЕ и Турција, две земји кои не воведоа ограничувања за трговијата со Русија, пренесува Гласот на Америка.
Земјата на потекло на повеќе од половина од трансакциите не е наведена во евиденцијата.
Во декември, американската влада се закани со казни за финансиските институции кои и помагаат на Русија да ги заобиколи санкциите и воведе санкции за компании од трети земји во текот на 2023 и 2024 година.
Руската централна банка и американската агенција за санкции, Канцеларијата за контрола на странски средства (OFAC), не одговорија на барањата на Ројтерс за коментар.
Русија почна да ги означува доларот и еврото како „токсични“ во 2022 година, бидејќи санкциите го прекинаа нејзиниот пристап до глобалниот финансиски систем, попречувајќи ги плаќањата и трговијата. Замрзнати се околу 300 милијарди долари девизни резерви на Банката на Русија во Европа.
Портпаролот на Европската комисија рече дека не може да коментира поединечни случаи на прекршување на санкциите. Тој додаде дека Европската унија се занимава со трети земји кога се сомнева дека санкциите се заобиколуваат.
Царинската евиденција го опфаќа периодот од март 2022 година до декември 2023 година, а Ројтерс не можеше да пристапи до поновите податоци.
Документите покажаа пораст на паричните приливи непосредно пред инвазијата. Помеѓу ноември 2021 и февруари 2022 година во Русија влегле 18,9 милијарди долари и евра, наспроти само 17 милиони долари во претходните четири месеци.
