Во среда, јужнокорејските парламентарци ќе побараат импичмент на претседателот на земјата, кој прво прогласи, а потоа ја укина вонредната состојба, што ја предизвика најголемата политичка криза во земјата во последните неколку децении.
Прогласувањето на вонредната состојба предизвика судир меѓу претседателот Јун Сук Јеол и парламентот, кој го отфрли обидот за прекин на политичките активности и цензурирање на медиумите, при што вооружени војници влегоа во зградата на парламентот во главниот град Сеул.
Коалицијата на опозициски партии планира денеска на дневен ред да стави предлог за импичмент на јужнокорејскиот претседател, кој потоа треба да се гласа во рок од три дена.
Оставки веќе се понудени од шефот на кабинетот и секретарите на Јун, изјави претставник на кабинетот на претседателот.
Хаотични сцени
Јун Сук Јеол во вторникот и се обрати на јавноста на телевизија за да ја објави одлуката за воведување вонредна состојба за одбрана на земјата од Северна Кореја и антидржавните сили и за заштита на уставниот поредок.
Набргу потоа следеа хаотични сцени. Војниците се искачија во зградата на парламентот преку скршени прозорци, додека воените хеликоптери летаа над главата. Вработените во Собранието се обидоа да ги оттурнат војниците прскајќи ги со пена за противпожарен апарат
Армијата соопшти дека ќе бидат забранети активностите на парламентот и политичките партии, а медиумите и издавачите ќе бидат ставени под надзор на воената команда.
Сепак, неколку часа по прогласувањето на вонредната состојба, 190 од 300 пратеници едногласно побараа нејзино укинување, меѓу кои и 18 членови од партијата на претседателот. Затоа, Јун Сук Јеол мораше да ја повлече својата одлука, како што налагаат јужнокорејските закони.
Демонстрантите се собраа пред зградата на парламентот и извикуваа „Победа, победа“. Многу поголем број демонстранти се очекуваат во среда, кога планира митинг на Корејската конфедерација на синдикати, која повикува на штрајк додека Јун Сук Јеол не поднесе оставка.
Американската амбасада ги повика граѓаните на САД да избегнуваат области каде се очекуваат протестни собири, додека некои од најголемите компании, како што е LG, ги советуваат вработените да работат од дома.
„Тој не може да ги избегне обвинувањата за предавство“
Водечката опозициска Демократска партија бара и оставка од претседателот, кој е на функција од 2022 година.
„Иако воведувањето воена состојба е запрено, тој не може да ги избегне обвинувањата за предавство. Претседателот Јун повеќе не може нормално да ја води државата. Тој треба да се повлече“, рече членката на партијата Парк Чан-дае.
За да помине барањето за импичмент во парламентот потребна е поддршка од две третини од пратениците. Во тој случај, барањето доаѓа до Уставниот суд, кој ќе ја донесе конечната одлука, а потребно е и двотретинско мнозинство или шест од девет судии да го потврдат импичментот.
Партијата на претседателот има 108 од 300 претставници во парламентот. Доколку Јун Сук Јеол биде разрешен или самиот поднесе оставка, тој ќе биде заменет од премиерот Хан Дак-су до нови избори.
„Јужна Кореја како нација избегна куршум, но претседателот Јун можеби си пукал во стапалото“, рече Дени Расел, потпретседател на Институтот за политика на Азија за општество во САД.
Американскиот државен секретар Антони Блинкен ја поздрави одлуката на претседателот за укинување на вонредната состојба.
Очекуваме политичките спорови да се решаваат по мирен пат и во согласност со владеењето на правото“, се вели во неговата изјава.
Планираните разговори за одбрана, како и заедничките воени вежби меѓу Јужна Кореја и САД се одложени, објави новинската агенција Јонхап. Одложена е и посетата на шведскиот премиер.
Јун Сук Јеол стана претседател на земјата по најнеизвесните претседателски избори пред две години, кога победи на бранот незадоволство на граѓаните од економските политики и скандали.
Сепак, многу брзо ја изгуби популарноста, неговата работа ја поддржуваат само околу 20 отсто од гласачите.
Прогласувањето на вонредна состојба е честа појава во Јужна Кореја од 1948 година, но последниот таков случај е забележан во 1980 година.
