Рангирањето на најмоќните пасоши во светот доживеа пресврт – шест земји се изедначени на првото место. Граѓаните на Франција, Германија, Италија, Јапонија, Сингапур и Шпанија можат да уживаат безвизен пристап или пристап при пристигнување до дури 194 дестинации ширум светот. Ова е највисока бројка откако Индексот за пасоши на Хенли ги следи овие податоци, односно во последните 19 години. Индексот го креираше Henley & Partners користејќи ексклузивни податоци од Меѓународната асоцијација за воздушен транспорт (IATA).
Азиските нации Јапонија и Сингапур доминираа на првото место во последните пет години, но има пораст на земјите од Европа. Финска и Шведска се изедначени со Јужна Кореја на второто место – со лесен пристап до 193 дестинации – додека Австрија, Данска, Ирска и Холандија се трети со 192 дестинации, пишува CNN.
На четвртото место се Белгија, Луксембург, Норвешка, Португалија и Велика Британија, додека на петтото место се Грција, Малта и Швајцарија. Австралија и Нов Зеланд го подобрија својот пласман и сега се на шестото место заедно со Чешка и Полска. Соединетите Американски Држави и Канада се изедначија на седмото место заедно со Унгарија, со пристап до 188 дестинации.
Обединетите Арапски Емирати постигнаа најмногу успех во рангирањето во изминатата деценија, а оваа година ја зазедоа 11-тата позиција. Хрватска е на 13-та позиција – има безвизен пристап до 179 дестинации, исто колку и Бугарија и Романија. Според податоците од Henley Passport Index, Хрватска беше на 15-то место минатата година, на 17-то во 2022 година и на 18-то место во 2021 година.
На дното на листата, со безвизен пристап до само 28 земји, се наоѓа Авганистан. Сирија со 29 дестинации е втора најниска на рангирањето, додека Ирак има 31, а Пакистан 34 дестинации.
„Просечниот број на дестинации до кои патниците можат да пристапат без виза е речиси двојно зголемен од 58 во 2006 година на 111 во 2024 година“, рече Кристијан Х. Каелин, претседател на „Хенли и партнери“ и креатор на Индексот за пасоши. Списокот на Henley & Partners е еден од неколкуте индекси создадени од финансиските фирми за рангирање на глобалните пасоши според пристапот што им го обезбедуваат на своите граѓани.
