Членките на ЕУ би можеле денеска да ги заострат правилата против пушење и да ја поддржат забраната за пушење и „вејпинг“ на некои отворени простори како што се игралишта, плажи, базени и тераси во кафулињата.
Препораката за забрана на пушење и на „вејпинг“ на отворено ќе биде предмет на расправа на 27 министри за здравство на состанок во Брисел.
Според дипломатски извори, препораката ќе биде усвоена и покрај политичките поделби околу тоа прашање кои станаа видливи минатата недела кога Европскиот парламент отфрли сличен документ.
Препораката не би била обврзувачка, имајќи предвид дека здравјето е единствена одговорност на земјите-членки. По првичниот предлог на Европската комисија во септември, нацрт-документот ги повикува членките на ЕУ да ги прошират ограничувањата за цигарите за да вклучат „нови производи“, како што се загреаниот тутун и електронските цигари, кои се се попопуларни меѓу младите.
Во пракса, тоа значи дека сите форми на пушење и употреба на тутун-производи би биле забранети на базени, во зоолошки градини, на автобуски станици, на покривни тераси на барови и на тераси во ресторани.
ЕУ има за цел да го намали загадувањето од пушењето, од околу 25% на помалку од 5%, до 2040 година.
