Градоначалникот на општина Карпош Стевчо Јакимовски не се откажува од надзор врз одржувањето на хигиената во општината. Тој вчера направил инспекција во периодот од 9.05 до 9.25 часот за да провери колку работници на Комунална хигиена има на булеварите Илинден, 8 Септември, Партинзански одреди, Теодосиј Гологанов, и на улиците Рузвелтова, Јуриј Гагарин, Московска и Љубљанска.
„На булеварот Илинден затекнат беше само еден работник кој беше во движење пред поранешната американска амбасада, на булеварот Теодосиј Гологанов работеше само еден работник кај ‘Млечен’, а двајца работници спроти ‘Симпо’ на булеварот Партизански одреди седеа на клупа и пушеа цигара. Истите работници и денеска само 20 минути порано одмараа на истата клупа. На останатите улици нема ниту еден вработен. Толерирање за неработењето на Комунална хигиена нема да има. Постојано ќе ги контролираме и ќе ги прозиваме“, соопшти Општина Карпош.
