Случаи на хепатитис од непознато потекло досега се пријавени во уште четири европски земји и во САД, соопшти Европскиот центар за превенција и контрола на болести (ECDC). Претходно, Светската здравствена организација (СЗО) во петокот објави дека следи 84 случаи на акутен хепатитис, од кои првиот беше потврден во Велика Британија на 5 април.
Случаи се пријавени и кај деца во Данска, Ирска, Холандија и Шпанија, соопшти ECDC. Девет наводни случаи се пријавени и во американската држава Алабама. „Истрагите се во тек во сите земји кои известуваат. Засега не е позната точната причина за хепатитис кај овие деца“, се вели во соопштението.Инфекцијата досега најмногу ги зафати децата до десет години, а симптомите се жолтица, дијареа, повраќање и болки во стомакот. Во повеќето случаи, децата немаа треска, но некои случаи во ОК беа толку тешки што пациентите мораа да бидат префрлени во специјализирани педијатриски гастроинтестинални единици. Шест деца мораа да имаат трансплантација на црн дроб.
Не се откриени познати вируси на хепатитис А до Е кај децата, така што британските здравствени власти ја испитуваат врската со вообичаените вируси или други можни причини како што се Ковид-19, инфекции или фактори на животната средина.
Засега, иследниците се сомневаат дека најверојатната причина е инфекција, соопшти ECDC. „Не е идентификувана поврзаност со вакцината против Ковид-19 и не е идентификувана детална изложеност од детални информации собрани преку прашалници за храна, пијалоци и лични прашалници“, додаваат од ECDC.
Директорката за клинички и нови инфекции во Британската агенција за здравствена безбедност, Мера Чанд, во петокот рече дека вообичаените хигиенски мерки, како што е миењето на рацете, помагаат да се намали ширењето на многу инфекции кои во моментов се истражуваат.
