Тимот американски истражители треба да почне најпрво од Владата, има многу корупција која може да се открие преку институциите како МВР, УЈП или Катастар без длабинска анализа, изјави лидерот на ВМРО-ДПМНЕ Христијан Мицкоски.
Мицкоски оценува дека ако има волја, власта може да го истражува криминално стекнатиот имот и без посебен закон за потеклото на имотот, но оваа власт не може тоа да го направи.
-Со овие луѓе во овие институции не само што нема надеж, туку корупцијата и криминалот може само да се продлабочуваат. Човекот којшто 7 години е на чело на министерството за внатрешни работи, владата којашто повеќе од 5 години е влада, и партијата којашто е дел од таа влада повеќе од 20 години и коишто се причината за криминалот и корупцијата во Република Македонија не можат да бидат решението. Така што било кој тим на истражители треба најпрвен да почне од владата – рече Мицкоски.
Тој смета дека решението е во предвремени избори.
– Со нови луѓе на чело на тие институции толку побргу ќе дојдеме до решение за овој криминал и корупција – рече Мицкоски.
По дилемите во јавноста дали овој американски тим ќе има и дипломатски притисок врз опозицијата за уставните измени, Мицкоски само потенцира дека пратеничката група на ВМРО-ДПМНЕ ќе остане обединета и нема да го смени ставот против бугарското барање.
