Европската комисија минатата недела предложи 27-те земји-членки на ЕУ да ја намалат потрошувачката на гас за 15 отсто од август до март. Целта би била доброволна, но Комисијата би можела да ја направи обврзувачка во случај на криза со снабдувањето со гас.
Брисел ги повика земјите да ја ограничат потрошувачката на гас за да помогнат во полнењето на резервите пред зимата и предупреди на можно целосно прекинување на испораките на руски гас.
Но, планот на ЕУ наиде на отпор од низа влади – некои жестоко се спротивставија на обврзувачките намалувања, а други не сакаат да дозволат Брисел да ја контролира нивната потрошувачка на енергија.
Дипломатите на ЕУ денеска ќе разговараат за ревидираниот предлог. Предлогот, ќе ја одржи доброволната цел за сите земји да ја ограничат потрошувачката на гас, но ќе постави различни задолжителни цели. Последниот предлог на Чешка, која во моментов претседава со состаноците на земјите-членки на ЕУ, нуди голем број исклучоци.
Земјите кои не се поврзани со гасните мрежи на ЕУ ќе бидат изземени од обврзувачката цел, која може да се примени на островските земји како Ирска и Малта, додека оние со големи количини гас во резерва може да се соочат со помали цели за ограничување на потрошувачката на гас.
Земјите кои извезуваат гас во други земји, исто така, би можеле да се соочат со пониски цели. Ова најверојатно ќе ја вклучи Шпанија, која не се потпира на рускиот гас и е меѓу најгласните противници на предлогот на ЕУ. И критичните сектори како хемикалиите и челикот би можеле да бидат изземени.
Според новиот предлог, националните влади, а не Комисијата, ќе бидат одговорни за процесот на обврските, што може да се направи само со поддршка на мнозинството земји. Европските дипломати имаат измешани ставови за последниот нацрт – некои го поздравија, додека други се загрижени за големиот број исклучоци.
Министрите за енергетика ќе треба да го одобрат утре. За да помине предлогот, треба да го поддржат најмалку 15 земји-членки на ЕУ.
