Во Осло денеска е доделена Нобеловата награда за мир која годинава ја делат белорускиот борец за човекови права Алес Бјаљак кој е во затвор, руската невладината организација за човекови права „Меморијал“ и украинскиот Центар за човекови права.
Останатите награди, чии победници беа објавени во октомври, ќе бидат доделени во Стокхолм.
Познатиот активист Јан Расински од невладината „Меморијал“ изјави дека руските власти побарале од нив да ја отфрлат наградата, но тие не прифатиле.
Организацијата за човекови права „Меморијал“ на почетокот на годинава доби забрана за работа. Повеќе од 30 години, таа работеше на откривање на приказните на милиони невини луѓе кои беа егзекутирани, заробени или кривично гонети за време на советската ера.
Пред осум години таа организација беше ставена на листата на „странски агенти“ во Русија, за кои владата тврди дека се финансирани од странство.
Групата беше затворена затоа што не ги етикетираше своите објави на социјалните мрежи со етикетата „странски агенти“, што е законско барање.
Раководителката на Украинскиот центар за граѓански слободи, Олександра Матвијчук вчера побара на рускиот претседател Владимир Путин да му се суди пред Меѓународниот трибунал за војната во Украина. Оваа адвокатка за човекови права во Осло изјави дека е убедена оти порано или подоцна Путин ќе биде изведен пред лицето на правдата.
Оваа година, наградата за медицина ја доби шведскиот генетичар Сванте Пајаб. Нобеловци за физика се Ален Аспект, Џон Ф. Клаузер и Антон Цајлингер, а наградата за хемија ќе им биде доделена на Каролин Р. Бертози, Мортен Мелдал и Карл Бери Шарплес.
Нобеловата награда за литература ја доби француската писателка Ани Ерно, а лауреати за економија се Бен С. Бернанке, Даглас В. Дајмонд и Филип Х. Дибвиг.
Нобеловите награди традиционално се доделуваат на 10 декември, годишнината од смртта на Алфред Нобел. Секоја награда добитникот добива чек во износ од 10 милиони шведски круни (900.000 евра). Доколку има неколку победници, оваа сума се дели меѓу нив.
