Нема да поднесам жалба на пресудата, оти сум задоволен од казните кои се изречени денеска во Кривичниот суд, рече јавниот обвинител Гаврил Бубевски кој ги гонеше Сашо Мијалков и Мендух Тачи во случајот „Титаник 2“ за изборни нерегуларности.
– Јас не би поднел никаква жалба во однос на казната затоа што мислам дека казната е во рамките на предвиденото со закон, но исто така сакам да спречам одолжување на постапката за да може Апелација да одлучува во законски предвидениот рок – рече Бубевски, објаснувајќи дека со самото тоа што нема да поднесе жалба ќе се скрати рокот за одлучување во Апелација, а предметот би бил завршен во април кога делото за Мијалков застарува.
Мијалков во случајот е осуден за примање награда за противзаконито влијание.
Тачи, како и четворицата поранешни членови на ДИК (Бедредин Ибраими, Анета Стефановска, Влатко Сајковски и Сашо Срцев) се осудени за повреда на избирачкото право и нивните казни се поблаги во однос на оние со претходната пресуда.
