Во Египет, каде хомосексуалноста е силно стигматизирана, полицијата лови ЛГБТ лица преку интернет, пишува Би-Би-Си, објавувајќи докази и разговори меѓу жртвите и полицијата, кои говорат за тоа како властите користат социјални мрежи и апликации за состаноци за да стигнат до ЛГБТ лицата.
Не постои експлицитен закон против хомосексуалноста во Египет, но кривичното дело „разврат“ – закон за сексуална работа, се користи за криминализирање на ЛГБТ-заедницата.
Според Би-Би-Си, во доставените полициски извештаи за апсење се содржат транскрипти од разговори кои покажуваат дека тамошните власти ги користат апликациите за да бараат ЛГБТ лица, иницираат он-лајн разговори со нивните мети, а во некои случаи дури и фабрикуваат докази против нив.
– Пораснав во Египет и свесен сум за распространетата хомофобија која продира во секој дел од неговото општество. Но, пријателите ми кажуваат дека атмосферата неодамна станала многу побрутална, а тактиката за следење на ЛГБТ-луѓето пософистицирана – изјави за Би-Би-Си, лице кое било таргет на тамошната полиција.
На геј-луѓето во Египет им е исклучително тешко да се сретнат јавно, така што апликациите за запознавање се популарен начин за тоа. Но, само користењето на апликациите, пишуваат од Би-Би-Си, без оглед на вашата сексуалност, може да биде основа за апсење врз основа на поттикнување разврат или закони за јавен морал во Египет.
