Скриените трошоци на светските системи за храна изнесуваат околу 10.000 милијарди долари годишно или десет проценти од светскиот бруто домашен производ, се наведува во најновиот извештај на Организацијата на ОН за храна и земјоделство (ФАО). Исто така, забележува дека овие трошоци главно се резултат на нездрава исхрана и еколошки штетни земјоделски практики.
Како што истакна Организацијата на ОН за храна и земјоделство (ФАО) во својот извештај за состојбата на исхраната и земјоделството, убедливо најголем дел од скриените еколошки, здравствени и социјални трошоци, повеќе од 70%, е предизвикан од потрошувачката на нездрава исхрана.
Во исто време, извештајот го истакнува зголемениот процент на масти, шеќер и преработена храна што ги консумираат многу луѓе како проблематичен. Тоа доведува до дебелина и други болести кои не само што ги оптоваруваат здравствените системи, туку предизвикуваат и пад на продуктивноста на работата.
ФАО како втора најчеста причина за споменатите трошоци ги наведува емисиите на стакленички гасови и неодржливата потрошувачка на вода.
Овие трошоци особено тешко ги погодија сиромашните земји, според наодите од извештајот. Со цел нивно намалување и правилно дефинирање, ФАО ги повикува политичките и економските претставници редовно да ги анализираат овие трошоци. Владите би можеле да користат законодавство, даноци и субвенции за да ги приспособат сегашните системи за храна.
Како што објави и ФАО, тие имаат намера да формулираат поконкретни мерки за намалување на скриените трошоци во наредната година.
