Руската паравоена група „Вагнер“ е регистрирана во Белорусија, а нејзините активности се означени како образовни услуги, според белорускиот државен регистар на правни лица.
Друштвото со ограничена одговорност „Група Вагнер“ е регистрирано на почетокот на август, а како вид на дејност на правното лице се наведени „други видови на образование“, пренесува РИА.
Според локалните медиуми, сопственик на новото правно лице е руската компанија „Конкорд менаџмент и консалтинг“, на чело со Евгениј Пригожин, основачот на „Вагнер“.
Литванската влада претходно денеска објави дека одлучила да затвори два од шесте гранични премини со Белорусија поради „геополитички причини“, само неколку недели откако борците од руската паравоена група „Вагнер“ пристигнаа во Белорусија.
Полска претходно го зголеми бројот на војници на границата со Белорусија поради загриженоста за активностите на Вагнерците.
