Во поплавите и одроните предизвикани од тропската бура на Филипините загинаа 110 луѓе, а беа погодени повеќе од 2,4 милиони, соопшти во вторникот националната агенција за катастрофи.
Триесет и три лица се уште се водат како исчезнати, а повеќе од 100 се повредени, додава агенцијата.
Педесет и девет лица загинаа во јужната провинција Магуинданао, каде што повеќе од 100 куќи беа однесени од поплави или затрупани од лизгање на земјиштето.
Шеснаесет лица се уште се водат за исчезнати во Магуинданао. Властите велат дека во овој момент има мали шанси да се најдат преживеани.
Дваесет и две смртни случаи беа во регионот на Западен Висајас, а 12 во провинциите Кавите, Лагуна и Батангас, јужно од Манила.
Погодените области претрпеа сериозни поплави откако бурата Налга донесе обилни дождови неколку дена пред да падне на истокот на Филипините во саботата.
Налга се оддалечи од Филипините, но нова тропска бура се движи кон источниот брег на земјата и се очекува да донесе повеќе дождови, соопшти метеоролошката служба.
Филипинскиот архипелаг е погоден од просечно 20 тропски циклони секоја година.
