Израелската армија во неколку наврати нападна неколку области на Газа. Гранатираше и бомбардираше згради во Хан Јунис, областите на бегалските кампови Џабалија и Нусејрат и болницата Камал Адван. Според локалните власти, загинале десетици луѓе.
Најмалку 23 лица загинаа во израелски напад врз станбена зграда во областа Ал Манар јужно од Хан Јунис, пренесоа странските новински агенции. Израелската армија го нападна и северниот дел на опустошената енклава. Меѓу другото, повторно беше гранатиран бегалскиот камп Нусејрат. Најмалку 18 лица ги загубија животите во нападите на поранешното училиште, кое по избувнувањето на војната беше претворено во засолниште за раселените Палестинци.
Бомбардирањето на израелските сили беше насочено и кон болницата Камал Адван на северот од енклавата. Во нападот загинаа неколку деца, пренесува Ал Џезира.
Израелската армија денеска соопшти и дека убила еден од напаѓачите, кој наводно работел за Агенцијата на ОН за помош и работа за палестинските бегалци (UNRWA) и истовремено учествувал во нападите врз Израел предводени од палестинското исламистичко движење Хамас на 7 октомври минатата година. „Мохамад Абу Итиви беше командант на единицата Нухба во баталјонот Ал Буреиџ во бригадата на Централните кампови на Хамас“, рече портпаролот на израелската армија Даниел Хагари, додавајќи дека имаат докази дека тој бил вработен во УНРВА.
Во оваа прилика, Хагари ги повтори израелските тврдења дека неколку вработени во УНРВА биле вклучени во нападите на 7 октомври. Истрагата на ОН не го потврди ова, но заклучи дека некои од нивните вработени „најверојатно биле вмешани“ во минатогодишниот смртоносен масакр и земање заложници во Израел.
